Boş vaxt keçirmə

Keçirsiniz çalışma masasının arxasına. Açırsınız kitabı. Oxumağa başlayırsınız. İçinizdən bir səs sizi başqa işlə məşğul olmağa səsləyir. Həm də dəlicəsinə. Beş dəqiqə ilə bir şey olmaz. Sadəcə on dəqiqə. İyirmi dəqiqə o qədər də böyük itki sayılmaz. İş də iş olsa, hər nə. İşin adı “boş vaxt keçirmə”.

Boş vaxt yalnız fəaliyyətsiz keçən zaman dilimi deyildir. Həm gedişatı, həm də nəticəsi etibarı ilə fayda verməyəcək işlə məşğul olmaq bir mənada boşuna vaxt keçirməkdir.

Sultan Süleyman Qanuni qabiliyyətli və istedadlı insanları mükafatlandırırdı. Bu səbəbdən bütün məharət sahibləri onun hüzuruna çıxmağa can atardılar. Üç metrlik məsafədən sapı iynəyə keçirməyi bacaran bir adamın da tək xəyalı padşahın hüzuruna çıxmaq idi. Vaxt keçdi, vədə doldu və bu şərəf ona da nəsib oldu. Beləcə təyin olunmuş gündə padşahın hüzuruna çıxdı. Qabiliyyətlərini sərgiləndi. Padşah böyük heyranlıqla tamaşa edirdi. Bir daha, bir daha…
Gördükləri doğru idi. Adam o qədər məsafədən sapı atır və iynənin dəliyindən keçirirdi. Padşah bunun səbəbini soruşdu: “De görək, haradandır səndəki bu qabiliyyət?”. Adam bəyənilmişliyin verdiyi əda ilə “Qırx ildir, gecə-gündüz demədən, bunun üçün çalışıram”, – səsləndi. Padşah gülümsədi və buyurdu: “Bu adama qırx qızıl verib. qırx da şallaq vurun”.

Saraydakılar əmrin qarşısında çaşıb qalmışdı. Qırx qızıllıq mükafatın ardından qırx şallaqlıq cəzaya nə ehtiyac var idi ki?…Padşah saraydakıları çox intizarda qoymadan sözünü davam etdirdi: “Qırx altın qeyri-adi qabiliyyətin üçün. Həqiqətən sən çətin bir işin öhdəsindən gəlmisən. Qırx şallaq da belə qabiliyyətli insan olduğun halda mənasız işlə məşğul olduğun üçün. Boşuna keçirdiyin bu vaxt ərzində daha gözəl işlər görə bilərdin.”

Demək, fayda və nəticə vəd etməyən işlə məşğuliyyət bir mənada boşuna vaxt keçirməkdir. İstər bu beş, istər on dəqiqə olsun, bu həyatınızın boşuna keçmiş dəqiqələri olacaq. Paul J. Meyerin bir sözü var: “Zamanın çoxu saatlar deyil, dəqiqələr olaraq boşa keçirilir. Dibində kiçik bir dəlik olan qab qəsdən boşaldılmış qab kimi boşdur”.

Elə isə, bir dəqiqənizi belə boşuna keçirməyin, çünki yaşamağımız üçün təklif edilən hər anın qiyməti böyükdür.

• Əgər bir ilin qiymətini anlamaq istəyirsinizsə, sinifdə qalmış şagirddən soruşun.
• Əgər bir ayın qiymətini anlamaq istəyirsinizsə, bir ay əvvəldən doğum həyata keçirən anadan soruşun.
• Əgər bir həftənin qiymətini anlamaq istəyirsinizsə, həftəlik dərc olunan jurnalın redaktorundan sorun.
• Əgər bir saatın qiymətini anlamaq istəyirsinizsə, görüşmək üçün gözləyən sevgililərdən soruşun.
• Əgər bir dəqiqənin qiymətini anlamaq istəyirsinizsə, qatarı təzəcə qaçırmış birisinə soruşun.
• Əgər bir saniyənin qiymətini anlamaq istəyirsinizsə, qəzadan qılpayı qurtulmuş adamdan soruşun.
• Əgər bir millisaniyənin qiymətini anlamaq istəyirsinizsə, olimpiadada gümüş medal qazanmış atletə soruşun.

Unutmayın zaman heç kəsi gözləmir. Zamanınızın zamanında qədrini bilin

Mükəmməllik arayışı. (Perfektionism)

Qəbul edin ki, kimsədən hər işi bacarması tələb olunmur. Hamımızın özümüzə xas xüsusiyyətlərimiz var. Başqalarından daha yaxşı bacardığımız işlər və ya başqalarının bizdən daha yaxşı olduğu məqamlar var. Özünüzə qarşı tolerantlı olun və “kifayət edəcək qədər yaxşıdır” anlayışını mənimsəyin.

Tərcümeyi-halınızı əlli dəfə yenidən yazarsınız. Son yazdığınız  bir əvvəlkinə nisbətdə həqiqətən daha yaxşımı idi? Ən gözəl paltarı tapmaq üçün bezmədən bütün bazarı gəzərsiniz. İlk gördüyünüz və bəyəndiyiniz paltar on beşincisi qədər gözəl deyildimi? Kifayət qədər yaxşını arayıb nə qədər zaman itirdiniz? Unutmayın, mükəmməllikdə yüksək standartları, həqiqətən mənası varsa, tələb edin.

Müəllif: Əsədulla Əliyev
Mənbə: «Müvəffəqiyyətə gedən yol»